Rusiye ve Ukraina prezidentleri Vladimir Putin ve Petro Poroşenko telefon vastasınen Ukraina vaziyetini muzakere ettiler.
Bunı Rusiye devlet yolbaşçısınıñ matbuat kâtibi Dmitriy Peskov bildirdi, dep haber ete Azatlıq Radiosı.
Onıñ aytqanına köre, eki memleketniñ liderleri qan tökülmesini acele toqtatacaq tedbirler aqqında fikirlerinen paylaştılar. Rusiye ve Ukraina prezidentleriniñ bu mevzuda fikirleri aman-aman bir-birine teñ kele, dep qayd etti Peskov.
Avgust 27-de Minsk şeerinde Putin ve Poroşenkonıñ birinci doğru muzakereleri olıp keçti.
Mütehassıslarnıñ ekseriyeti olarnı neticesiz dep adladı.
Ukraina lideriniñ malümatına köre, olar «mürekkep ve qıyın» oldılar. Putin muzakerlerni müsbet olaraq tanıdı. Eki memleketniñ prezidentleri Ukraina şarqındaki barışıq planı ve Donetsk ve Lugansk vilâyetlerine gumanitar yardımnı yetkizüv meselelerini muzakere ettiler. Bunıñnen beraber, eki memleketniñ sıñır hızmetleri arasında mesleatlar ve gaz boyunca muzakerelerniñ devamı aqqında añlaştılar.
