Kezlevdeki Cuma-Cami yanında olğan «Han-Cami» din cemiyetini elge keçirdiler. Bunı Kezlev musulmanları aytalar. Olarnıñ malümatına köre, cemiyetniñ yañı azaları cami hazinesinde olğan bütün paranı aldılar, dep haber ete 15 minut saytı.
Neşirniñ bildirgenine köre, bir ay evelsi «Han-Camide» deñişmeler oldı. Cemiyetniñ artıq sabıq azaları olğan adamlar deyler ki, o vaqıt cami imamı Elmar Abdulganiyev toplaşuv keçirdi. Tedbirde cemiyetniñ yañı azalarını saylaycaq ediler, lâkin onıñ bir sıra azalarınıñ toplaşuv aqqında haberleri de olmadı.
Din cemiyeti azalarınıñ esabatını diñlemeyip, yañı 12 azanı sayladılar. Yañı saylanğan azalar arasında, esasen, habaşizm areketiniñ vekilleri mevcut. Qırım musulmanları Diniy idaresi (QMDİ) olarnı sekta dep adlağan edi.
Cemiyetniñ sabıq azaları yañı azalarnı cami hazinesinde olğan paranı – anda em ruble, em de çetel para bar edi – elge keçirüvde qabaatlaylar.
«Han-Caminiñ» yañı erkânı saylanğan soñ seyfni bozıp taşladılar. Anda bayağı para bar edi: 191 biñ ruble, tahminen 8 biñ Amerika parası, 500 Türkiye parası ve 45 yevro, dep yaza neşir.
«Cemiyetimizniñ sermiyası qayda kete bizler bilmeyik» , – dep ayta din cemiyetiniñ hazine reberi Narim Aşirov.
Cami imamı Elmar Abdulganiyev ATR telekanalınıñ jurnalistlerine vaziyetni añlatır eken, «cemiyetniñ sabıq azalarını esli başlı olğanları içün çıqardılar, çünki olarnıñ çalışmağa çareleri yoq. Olarnıñ yerine, imamnıñ aytqanına köre, cemiyet erkânına genç, inkişaf etken ve tasil alğan adamlar kirdiler», dep bildirdi.
İmam para alınmasınen bağlı qabaatlarnı red ete. Onıñ aytqanına köre, hazineniñ sabıq reberi paranı bermege istemedi, onıñ içün seyfni bozmağa mecbur oldılar.
Abdulganiyevniñ aytqanına köre, cemiyet erkânı deñişken soñ, onıñ azaları Qırım musulmanları Diniy idaresine boysunmaycağını ve meydanğa ketirilgen yañı «Tavriya Müftiyatına» keçecegini bildirdiler. «Tavriya Müftiyatınıñ» reberi olaraq Qırım musulmanları Diniy merkezi (QMDM) reis muavini olğan Ruslan Saitvaliyev tayinlendi. Bu teşkilâtnı «habaşizm» areketinen bağlaylar.
Qırım musulmanları Diniy idaresi «Han-Cami» din cemiyetindeki vaziyetke emiyet berecek. Mında berilgen malümatqa köre, cami QMDİ ait ve Qırım musulmanları Diniy idaresiniñ razılığı olmasa, onıñ başqa bir de bir teşkilâtqa keçüvi imkânsızdır. Al-azırda QMDİ nezaret organlarına şikâyetler azırlay.
