Ukraina Nazirler şurası nevbetten tış toplaşuvında Ukraina prezidentiniñ «2014 senesi içün Ukraina-NATO işbirligi Bir yıllıq milliy programmasınıñ tasdıqlanması aqqında» buyruğına qol tuttı. Bunı sentâbr 2-de Ukraina Nazirler şurasınıñ matbuat hızmeti bildirdi.
Bu vesiqalar Ukraina tışqı işler Nazirligi tarafından daa 2013 senesi azırlanğan edi, 2014 senesiniñ başında ise ükümet muşaveresinde tasdıqlanğan ve Ukraina prezidentine teslim etilgen edi.
Lâkin 2014 senesiniñ mart ayında vesiqa Ukraina tışqı işler nazirligine ğayrıdan azırlanması içün keri qaytarıldı, çünki Ukraina Nazirler şurasınıñ erkânı deñişti, em de Ukrainada içki ve tışqı siyasiy vaziyet bam-başqa oldı.
İşbu leyha Ukraina tışqı işler nazirligi tarafından Ukrainanıñ Şimaliy atlantik añlaşma Teşkilâtınıñ iştiragi ile ğayrıdan azırlandı. Mında Rusiye Federatsiyasınıñ bizim devletimizge qarşı istilâsı közde tutıldı.
NATO Ukraina ile işbirlik programmalarına kösterilgen maddiy yardım miqdarını arttırdı.
Sentâbr 4-5 künleri Büyük Britaniyada NATO Sammiti ötkerilecek, onıñ çerçivesinde Ukraina-NATO Komissiyasınıñ toplaşuvı devlet ve ükümet yolbaşçıları derecesinde keçirilecek, onıñ içün tasdıqlanğan prezident Buyruğınıñ leyhası şimdilik ğayet aktualdir. Ukraina 28+1 formatında yüksek derecede körüşüv ötkerilecek yekâne ortaq memleketi olması mümkün, – dep qayd ettiler Ukraina Nazirler şurasınıñ matbuat hızmetinde.
