İlk sefer qıtaiy Ukrainada yerleşken aliy oquv yurtında «qırımtatar filologiyası» bölügi açıldı. Sentâbr 1-de Şevçenko adına Kiyev milliy universitetiniñ studentleri Qırımnıñ tamır halq tili ve edebiyatını ögrenip başladılar. Yañı bölükke oqumağa kirgen birinci kurs studentleri arasında qırımtatar halqınıñ vekilleri yoq.
Fakultetniñ tantanalı açılış tedbirinde bulunğan Qırımtatar Milliy Meclisiniñ reisi Refat Çubarovnıñ qayd etkenine köre, qabul etüv pek keç ilân etildi.
«Diger millet vekilleriniñ qırımtatar tilini zenaat olaraq saylap alğanları bizni quvandıra. Kiyev milliy universitetinde oquğan qırımtatarlar bu gruppağa yardımcı olacaqlar, dep keliştik. Mence, mında pek qaviy studentler gruppası pekitilecek», – dep ayttı Meclis reisi Qırım.Aqiqat saytına.
«Maydan inostrannıh del» fondunıñ yolbaşçısı Bogdan Yaremenko emin ki, qırımtatar filologiyasında oquğan studentler Qırımnı qaytaruv ve yarımadanıñ tamır halq vekilleriniñ aq-uquqlarını qoruv meselelerinen oğraşqan icra akimiyet organlarında kerek olacaqlar.
Birinci kurs studentleri Qırım.Aqiqat mühbirinen laf etip, bu zenaatnı almaq qararlarınıñ farqlı sebeplerini aydınlattılar. Bazıları Qırımnıñ tamır halqınıñ tilini ögrenmege istediler, bazıları ise yarımada işğalinden soñ böyle qararğa keldiler.
