Avgustnıñ 31-den sentâbrniñ 1-ne keçer gecesi belgisiz şahıslar Aqmescitte Şmidta, 2 adresi boyunca yerleşken Qırımtatar Milliy Meclis binasını çirkin ve pis laflarnen aqaretlediler.
Bunı Qırım.Aqiqat saytına Meclis kâtibiyetiniñ reisi Dilâver Akiyev bildirdi.
«Saqçı gece saat ekilerde nezaret kamerağa baqıp, Meclis binasınıñ kiriş qapusını ayağınen itegen ve saqlanğan belgisiz şahısnı kördi, bundan soñ o binadan çıqtı ve Meclis binasınıñ divarında çirkin işaretler ve nişanğa oşağan bir resimlerni kördi», – dep tarif etti Akiyev.
Onıñ aytqanına köre, birden uquq qoruyıcılar, şu cümleden FSB hadimleri davet etildi, olar kameralardan videolarnı alıp, vaziyetni ögrenecekler, dep bildirdiler.
«Mence, taqiqat, er daim olğanı kibi, bir şey tapmaz, çünki bir qaç ay evelsi Meclis binasına boya atılğan edi, bugünge qadar bir kimseni mesülietke çekmediler», – dep qayd etti Meclis kâtibiyetiniñ reisi.
O, işbu vandallıq areketini «qırımtatarlarğa qarşı provokatsiya ve meyil» dep adladı.
«Bu daa bir provokatsiyadır. Bilesiñiz, Qırımda saylavlar künü yaqınlaşa ve Meclis qırımtatarlarnı, ve er kesni olarda iştirak etmemege çağıra. Bizim malümatımızğa köre, halqımıznıñ ekseriyeti buña emiyet berdi», – dedi Akiyev.
Onıñ bildirgenine köre, al-azırda Meclis binasından mezkür yazılarnı sileler.
