Avgust ayı devamında Qırımda kitap tükânları ve ayırı satıcılarda FHH hadimleri teşkerüvler keçirip, bazı kitaplarnı sebeplerni añlatmadan tahliye ettiler. Bunı «Facebook» saifesinde Meclis reisi Refat Çubarov yazdı.
Onıñ aytqanına köre, şu kitaplar sırasında qırımlı tarihçı Gülnara Bekirovanıñ 2014 senesi çıqqan «Mustafa Cemilev: Yıllar devamında qırımtatarlarnıñ sesi eşitilmedi» kitabı da bar.
«Bu kitap qırımtatarlar lideri Mustafa Cemilevniñ cemaat, uquq qorçalayıcı, siyasiy faaliyetini aydınlata. Onıñ içinde qırımtatarlarnıñ milliy areketiniñ teessis etilüvini añlatqan mahkeme qararlar aqqında yazıla, P.Grigorenko, A.Saharov kibi belli uquq qorçalayıcılarnıñ M. Cemilevge bağışlanğan hatırlavlarından parçalar, 1976 senesi Omsk mahkemesinde ayırı halqlarnı repressiyalarğa oğratqan qurumnıñ cinayetlerinen bağlı aytqan soñki sözü bar», – dep yaza Refat Çubarov.
Bildirgenine köre, kitapqa qırımtatar halqı Qırımğa avdet etken soñ, Mustafa Cemilevniñ çeşit neşirlerge bergen intervyüsı, Yuqarı Rada minberinden çıqışı, Yevromaydan sanasında aytqanları, 2014 senesi martnıñ 31 –nde BMT Havfsızlıq Şurasında aytqan nutqı kirsetildi.
Evelden aytılğanı kibi, Qırım «akimiyeti» iyül 5 künü yarımadağa Meclis reisi Refat Çubarovğa kirişni 5 yılğa yasaqladı. Bundan evel tamam şu yasaqqa Mustafa Cemilev oğradı.
