Link açıqlığı

Meclis Cemilevni qarşılamağa çıqqan qırımlılarğa para cezalarnıñ tölenilmesinde yardım etmege çağıra


Qırımtatar milliy Meclisi mayıs 3 künü numayışta iştirak etken qırımlılarğa Rusiye akimiyeti tarafından belgilengen para cezalarınıñ tölenilmesinde yardım etmege çağırdı. Bu aqta Meclis reisi Refat Çubarovnıñ avgust 29 künü aşkâr etilgen beyanatında aytıla.

2014 senesi mayıs 3 künü qırımtatar halqınıñ yetekçisi, Ukraina halq deputatı Mustafa Cemilevni qarşılamağa çıqqan yüz qırımlı Qırım ve qıtaiy Ukraina arasında memuriy sıñırda akimiyet tarafından mahkeme taqibine oğradı.

«Bu qanunsız para cezalarnıñ maqsadı yalıñız konkret bir insannıñ «cezası» degil de, ilk evelâ qırımtatar halqınıñ aqqını qorçalamağa iradesiniñ bozuluvı olğanını añlaymız. Qırımtatar milliy Meclisi mahkeme taqibine oğrağan qırımtatarlarnıñ menfaatını tüşünip, olarnıñ aqlarınıñ qorçalavı boyunca bütün tedbirlerni becerdi, faqat Qırımda bugün adaletli akimiyet ve adaletli mahkeme yoqtır. Al-azırda insan aqları boyunca Avropa mahkemesine arizalarnıñ berüvi içün vesiqalar azırlana», – denile beyanatta.

Faqat buña vaqıt kerek olur, cezalarnı ise «ileri repressiyalarnıñ ögüni almaq içün» ödemege kerek», – dedi Meclisniñ reisi ve vatandaşlarğa repressiyalarğa oğrağan insanlarğa qol tutmaq ricası ile bulundı.

«Qırımtatar halqınıñ ayatında kene ağır vaqıtlar başlandı. Nesilimizniñ yoluna tüşken sınavlar bizden sabır ve şahsiy itibarnı talap ete. Vatanğa qaytuv ve qırımtatar halqınıñ tarihiy toprağında aqqınıñ pekitilüvi oğrunda küreşimiz şunı bildire ki, eger de halq birlikte olsa istenilgen maqsatlarğa irişmek mümkün ve ağır vaqıtta yardımğa muhtac olğan insanlar destek köre bilir», – dedi Refat Çubarov.

Aynı zamanda, qırımtatar milliy Meclisi yardım qolunı uzatqan insanlarğa öz minnetdarlığını bildirdi.

XS
SM
MD
LG