Rusiye prezidenti Vladimir Putin Rusiye Qırımnı işğal etmedi, «qorçaladı» dep tüşüne. Bunı o, avgust 29 künü, «Seliger» forumında çıqışta bulunıp, bildirdi, – dep haber ete İTAR-TASS.
«Onı işğal etmedik, tutıp almadıq. Biz insanlarğa kendi fikirlerini bildirmege imkân berdik ve olarğa ürmet ile yanaştıq. Olarnı qorçaladıq dep tüşünem», – qayd etti o.
Putin şunı da dedi ki, aks alda bugün Ukraina şarqında olayatqanı Qırımda da olur edi.
Putinniñ fikrince, Qırımda 2014 senesi baar vaqiaları vaqtında «insanlar biz aqlı olğanımıznı duydı ve añladılar, biz Qırımnıñ Ukrainağa qanunsız teslim etilgeni ile bağlı tarihiy adaletsizlikni tüzetmek kerekmiz» – dedi o.
Rusiye prezidenti «SSSR qanunlarına köre, qararnı cumhuriyetlerniñ yuqarı şuraları almaq kerek edi, onı ise prezidium aldı».
Putin şunı da qayd etti ki, bu qararlar «rus ealini qorçalamaq içün» alınğan eken.
«Endi ise, menimce, Donbass, Lugansk, Odessağa baqqanda, er kes añlay. Endi, eger de biz halqnıñ serbest idaresini temin etmek içün mütenasip qararlarnı almasa edik, Qırım ile neniñ ola bilecegini añlaymız», – dedi o.
Qırım vaqiaları, prezidentniñ fikrine köre, rusiyelilerni birleştirdi. «Şunıñ içün milliy mevamımız bizde bardır» – dep yekün çekti o.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
