Link açıqlığı

Türkiye akimiyeti Cemilevge işğal etilgen Qırımğa kendi uçaq ve gemileriniñ ziyaretlerini teşkermege vade etti


Ukraina prezidentiniñ qırımtatarlarnıñ işleri boyunca vekâletli Mustafa Cemilev Türkiye memurlarına Rusiye tarafından işğal etilgen Qırımğa olarnıñ uçaq ve gemileriniñ kirgeni boyunca vaziyetni ögrenmege ricası ile bulundı.

Bunı o Qırım.Aqiqatqa bildirdi.

Cemilevniñ malümatına köre, Türkiyede olğan vaqıtta, cumaaqşamı künü, o, Türkiye ükümetiniñ vekilleri ile körüşti.

«Türkiye uçaqları alâ daa Aqmescitke kelgenini muzakere ettim. Rusiyeniñ işğali sebebinden bu yasaqtır. Ukraina akimiyeti buña razılıq bermedi. Memurlar maña şunı bildirdiler ki, vesiqalar boyunca bu sefer «Anapa – İstanbul» kibi belgilene. Bu uçaqlar aqiqaten Aqmescitte mingenini teşkermege söz berdiler»,– dedi o.

Bundan da ğayrı, Cemilev Türkiye akimiyeti vekilleriniñ diqqatını Qırım limanlarına türk gemileriniñ kelüvine de celp etti.

«Soñki vaqıtta Qırım limanlarına kirgen bir qaç türk gemini hatırlattım. Amma maña işbu gemiler endi çoqtan Rusiyege satılğanını bildirdiler. Türkiye olar içün mesülietli degil eken. Maña böyle dediler», – dedi o.

Аvgust 28 künü, Ankarada, Türkiye prezidenti Recep Erdoğannıñ inauguratsiyası olmalı. Tantanalı tedbirge davet olğan eyyetler arasında ukrain eyyeti de bar edi, onıñ terkibine prezident Petro Poroşenko bar edi. Amma Ukraina şarqında vaziyetniñ kerginleşüvi sebebinden devlet başı bu ziyaretni lâğu etti. Ukrain tarafnı inauguratsiyada qırımtatarlarnıñ işleri boyunca vekâletli Mustafa Cemilev temsil etti.

XS
SM
MD
LG