Link açıqlığı

Qırımnıñ «tasil nazirliginden» qırımtatar tili dersleriniñ qısqartuvı meselesini çezmege talap eteler


Qırımtatar tasil hadimleri «Maarifçi» birleşmesi Qırımnıñ «tasil, ilim ve gençlik naziri» Natalya Gonçarovağa yañı oquv yılınıñ arfesinde qırımtatar tili ile bağlı meselelerini çezmege talap etti.

Qırımtatar tiliniñ ögretüvi boyunca problemler aqqında malümatnı öz Facebook saifesinde «Qurultay-Ruh» firqasınıñ qırım deputatı Safure Kacametova yerleştirdi.

«Regionlardan kelgen kederli malümatlarğa köre, qırımtatar tili ve edebiyat fenleriniñ saatleri rus tilli ögretüvi ile mekteplerniñ oquv planlarında şübe astındadır, çünki ocalarnıñ işlev cedveli ve ana-babalarnıñ istegi ile problemler peyda ola»,– denile birleşmeniñ malümatında.

«Maarifçi» vekilleriniñ fikrince, bu şunı tasdiqlay ki, «mektep müdirleriniñ iradesi ile, oquv planları, tuvğan til saatleri nazarğa alınmadan, qabul etildi».

«Rus tilli oqutuvı ile mekteplerde tuvğan tilniñ ögrenüvine regional ve mektep qısımlarından aftada 3 saat ayırılmalı. Bu qaideniñ körmemezlikke urulğanı qırımtatar ve ukrain tilleriniñ ocaları, ana-baba ve mektep memuriyeti arasında ziddiyetlerni doğura», – deyler birleşüvde.

«Maarifçi» vekilleri qayd etkeni kibi, qırımtatar tilli oqutuvı ile mekteplerde ve rus tilli oqutuvı ile mekteplerniñ qırımtatar sınıflarında ocalarnıñ yükletüvi ile problemler azca, amma 5-9 sınıflarda qırımtatar tili saatleriniñ saqlanuvı ve arttıruvı boyunca qırımtatar tilli oqutuvı ile mektepler 6 künlük oquv aftasına keçmeli.

Birleşme Qırım regionlarında qırımtatar tili oqutuvı boyunca vaziyetniñ talilini ketire.

Misal içün, Aluştada, 13 mektepten 4 mektepte qırımtatar tiliniñ fakultativ ögrenüvi teklif etile. Kezlevde İsmail-bey mkr. № 18 mektebinde bu sene üç birinci sınıf açıla. № 14, 15, 16 mekteplerde qırımtatar tili ve edebiyat fenlerine aftada 3 saattan, 2 saat berile.

Yaltada qırımtatar tili ve edebiyat fenleri Qızıltaş, Vasilyevka, Simeiz, Köreiz mekteplerinde ve Yalta şeeriniñ № 10 mektebinde fakultativ şeklinde kirsetilmek kerek.

Bağçasaray rayonında Bağçarasay şeeri, Alma Tarhan ve Küçük Yaşlav köyleriniñ qırımtatar tilli oqutuvı ile 3 mektepte qırımtatar sınıfları açıla. Diger mekteplerde qırımtatar tili ve edebiyat fenleri talebelerge köre ögrenilecek: ya fen olaraq, ya fakultativ.

Evel işğal etilgen Qırım memurları yarımadada başlanğıç sınıflarda artıq ukrain tilli sınıflar olmaycağı aqqında bildire ediler. Çünki bunı istegenler tapılmağan eken.

XS
SM
MD
LG