Yaqında Ukraina prezidentiniñ qırımtatarlarnıñ işleri boyunca vekâletli olğan halq deputatı, qırımtatarlarnıñ milliy yetekçisi Mustafa Cemilev kelecek parlament saylavlarında ukrain prezidenti Petro Poroşenkonıñ komanda terkibinde namzetini köstermege niyetindedir.
Bunı o Qırım.Aqiqat mühbirine bildirdi.
Mustafa Cemilev oña «Batkivşçina» firqası deputatlarınıñ cedveline kirmege teklif etilgenini de bildirdi. Faqat, Meclisniñ sabıq başı bu teklifni red etecigini tüşüne.
«Maña Timoşenkodan teklif kelgen edi, amma şimdi prezident blokı teşkil etile. Prezidentniñ blokına kirmege daa da doğru olacağını tüşünem, çünki o bütün demokratik küçlerini birleştire. Men prezidentimizniñ teklifine seslenecegim, ğaliba», – dedi Cemilev.
Bundan da ğayrı, onıñ sözlerine köre, Petro Poroşenko Blokınıñ namzetleri cedveline qırımtatar milliy Meclisiniñ reisi Refat Çubarov da kire bile. Qırımtatarlarnıñ yetekçisi Çubarovnıñ namzetini Poroşenkoğa teklif etti, Poroşenko ise razı oldı eken.
Ukraina prezidenti Petro Poroşenko öz avalesi ile avgust 27 künü Yuqarı Şurasınıñ vekâletlerini toqtattı ve parlamentniñ nevbetten tış saylavlarını oktâbr 26 kününe belgiledi.
