Link açıqlığı

Türkiye, imkâniyeti olğanı qadar, Ukrainağa yardım eter, şu cümleden işğal etilgen Qırımda. Bunı Qırım.Aqiqat mühbirine qırımtatarlarnıñ yetekçisi Mustafa Cemilev bildirdi.

Türkiye Ukraina ve Qırım meselelerine daa da çoq diqqat ete bilecekmi degen sualge Mustafa Cemilev, «ağır vaziyetke» baqmadan, diqqat ete dep cevap berdi.

«Öyle de yardım ete, amma anda qıyın vaziyet üküm süre: bir taraftan, Rusiye ile müim bağları, şunıñ içün nasıldır bir açıq-aydın arektlerni Türkiye yapmay, amma imkânı olğanı qadar bizge yardım ete», – dedi Cemilev.

Qırımtatarlarnıñ lideri aytqanı kibi, Türkiyeniñ yañı prezidenti Recep Erdoğan Ukrainağa yardım etmek kerektir.

«Eñ esası: prezident, imkânı olğanı qadar, memleketimizge bu ağır zamanda yardım etmeli. Yaralanğan insanlarımıznıñ Türkiyede tedaviylevi aqta biz endi aytqan edik – bu mevzuda qonuşacaqmız», – dedi o.

Belli olğanı kibi, avgust 28 künü, Ankarada, Türkiye prezidenti Recep Erdoğannıñ inauguratsiyası olmalı. Tantanalı tedbirge davet olğan eyyetler arasında ukrain eyyeti de bar edi, onıñ terkibine prezident Petro Poroşenko bar edi. Amma Ukraina şarqında vaziyetniñ kerginleşüvi sebebinden devlet başı bu ziyaretni lâğu etti.

Ukrain tarafnı inauguratsiyada qırımtatarlarnıñ işleri boyunca vekâletli Mustafa Cemilev, çetel işler naziri Pavlo Klimkin, prezident Memuriyetiniñ başı muavini Valeriy Çalıy, Ukraina prezidentiniñ birinci yardımcısı Yuriy Onişçenko, Türkiye Cumhuritinde Ukraina elçisi Sergiy Korsunskiy temsil etecekler.

XS
SM
MD
LG