Bağçasarayda Han saraynıñ merkeziy meydanında avgust 27 künü saat 19:30 «Bağçasaray çeşmesi» baletini kösterdiler. Numayış Qırım akademik Ukrain muzıkalı teatriniñ aktörları icrasında oldı, dep haber ete Qırım.Aqiqat mühbiri.
«Bu kibi tedbir Han saraynıñ müzey kompleksiniñ merkeziy meydanında ilk sefer ötkerile. Böyleliknen seyirciler o zamandaki müitni daa da güzel añlay bile»,– dep tarif etti qoruqnıñ müdiri Elmira Ablâlimova.
Onıñ sözlerine köre, Han sarayda teatr aqşamları avgust ayında başlandı.
«İlk olaraq qırımtatar teatrniñ «Arzı qız – Mishor qızı» degen numayışı kösterildi. Bağçasaray çeşmesi ise Ukrain muzıkalı teatrniñ icrasında numayış etildi», – dedi müdire.
Oyunnı han saraynıñ azbarında köstermege ğaye müzey hadimlerine ait.
«Seyircilerniñ sayısına köre, bu muvafaqiyetli bir ğaye olğanını ayta bilem», – dey Ablâlimova.
Qırım.Aqiqat mühbirine Qırım akademik Ukrain muzıkalı teatrniñ aktörı Ernest Prtıhov aytqanı kibi, baletni çoq kere kösterdiler, amma böyle müitte olar ilk sefer çıqışta bulundılar.
«Açıq avada, em de sarayımıznıñ azbarında ilk sefer çıqışta bulunamız. Pek memnünmiz, atta seyircini körmeymiz, er şey aqiqaten olğanı kibi duyula»,– dey o.
«Bağçasaray çeşmesi» – bestekâr Boris Asafyevniñ Aleksandr Puşiknniñ poeması boyunca yazılğan oyun poemasıdır. O 1934 senesi Nikolay Volkovnıñ stsenariyi boyunca baletmeyster Rostislav Zaharov tarafından sanalaştırıldı.
