Ukraina prezidenti Petro Poroşenko yañı saylanğan prezident Recep Tayyip Erdoğannıñ inauguratsiyası munasebeti ile Türkiyege baracaq ola. Poroşenkonıñ eyyeti terkibine qırımtatarlarnıñ meseleleri boyunca vekâletli Mustafa Cemilev kire.
Bunı brifing devamında Kiyevde Ukraina prezidentiniñ Memuriyet başı muavini Valeriy Çalıy bildirdi.
Onıñ sözlerine köre, tantanalı körüşüv bir sıra memleketlerniñ liderleri ile malüm bir maqsat boyunca keçirilecek körüşüvge çevirile bile.
«Şimdi Türkmenistan prezidenti ile müim körüşüvlerge ümütimiz bar, Qazahistan prezidenti ile munasebetimizniñ pekitilecegine de ümüt besleymiz», – dedi Çalıy.
O, türk-ukrain munasebetlerniñ ve qırımtatarlarnıñ meselesiniñ müimligini de qayd etti.
«Qırım meselesi, qırımtatarlarnıñ ve türk-ukrain munasebetlerniñ meselesi – Ukraina Prezidenti bunı daima nazarda tuta», – dedi Çalıy.
Türkiyede avgust 29 künü yañı baş nazir Ahmet Davutoğlu vazifesine başlaycaq, em de Türkiyeniñ yañı prezidenti Recep Erdoğannıñ inauguratsiyası ötkerilecek.
Avgust 10 künü Erdoğan memlekette ilk keçirilgen prezident saylavlarında ğalebe qazandı. O, devlet başınıñ vekâletlerini kenişletmek maqsadı ile anayasanı deñiştirmek niyetindedir. Evel Türkiye prezidenti temsiliy vazifelerni eda ete edi.
