Rusiye tarafından işğal etilgen Qırımda insan aqlarınıñ, hususan milliy azlıq vekilleriniñ aq-uquqlarınıñ bozuluvı adiseleri qayd etile. Bunı BMT-nıñ 34 adamdan ibaret köz eticileri öz maruzasında bildirdiler, dep bildire Reuters.
BMT vekilleri qayd etkeni kibi, Qırımda «ukrain vatandaşları, qırımtatar ealisi ve diger azlıqlarnı taqip etmege devam eteler».
«Mart yında olıp keçken «referendumdan» soñ, Qırım «imayecileri» insan aqlarını bozıp başladılar, bu adiseler boyunca taqiqatlarnı alıp barmaq içün bir de bir adım yapılmadı», – dep aytıla maruzada.
Qırımda insan aqları bozuluvı aqqında bir sıra uquq qorçalayıcı, cemaat teşkilâtları, Meclis bildirgen edi. Bundan evel, Ukraina tış işler nazirligi BMT-nı Qırımda aq-uquq ve serbestlikni nezaret etmek içün işbirlikke çağırğan edi.
