Link açıqlığı

Saatnıñ esas haberi

Meclis qırımtatarlarnıñ aq-uquqlarını bozalar dep, saylavlarnı boykot etmege çağıra


Qırımtatar Milliy Meclisi Qırımnıñ şimdiki «akimiyeti» insan aqlarını ve qırımtatar halqınıñ aqlarını boza, dep bildire. Bundan sebep qırımlılarnı kene de 2014 senesi sentâbr 14-ke keçirilmesi belgilengen Qırım «parlamenti» ve yerli idare organları saylavlarında iştirak etmemege çağırdılar. Bu aqqında qırımtatarlar temsil organınıñ resmiy saytında yerleştirilgen Meclis beyanatında aytıla.

Vesiqada aytıla ki, 2014 senesi mart 3-te Aqmescit merkezinde yaqalanğan, soñra ise horlav izlerinen cesedi tapılğan Reşat Ametovnıñ qatili alâ daa tapılmadı. Bundan ğayrı, 2014 senesi mayıs ayında ğayıp olğan cemaat faalleri Leonid Korj, Timur Şaymardanov ve Seyran Zinetdinov aqqında bir de bir malümat yoq. Beyanatta mayıs ayında Mustafa Cemilevni sıñırda qarşılağan qırımtatarlarğa nisbeten devam etken mahkeme taqipleri qayd etile.

«FSB hadimleri ve silâlı adamlarnıñ Aqmescit rayonınıñ Bulğanaq (Kölçugino) köyündeki medresede babalarğa ücüm etüvniñ teşkilâtçıları ve eda etken adamları öyle de ceza almadılar. Daa doğrusı, medrese ve camilerge ücümler «teşkerüv» olaraq sıq-sıq ötkerilip başladı», – aytıla beyanatta.

FSB hadimleri cemaat faallerini qorquzmaq maqsadında subetler keçirmege devam eteler, dep aytalar Mecliste.

Aynı vaqıtta, temsil organınıñ malümatına köre, qırımtatarlarnı bölecek olalar. Böylece, «akimiyet» nezaret altında olacaq «cemaat» teşkilâtları ve parallel «müftiyatlarnı» meydanğa ketire.

«Qırımnıñ yañı akimiyeti qırımtatarlarnı bölmek maqsadında Meclisniñ üç azası Remzi İlyasov, Zaur Smirnov ve Teyfuk Gafarovnı kendi tarafına çekip, Qırım akimiyet organlarında Meclis razılığı olmasa da, belli bir vazifelerge tayinledi. Ondan sebep qırımtatarlarnıñ temsil organı olarnı Meclisteki vazifelerinden boşatmaq ve prezidium erkânından çıqarmaq qararına keldi», – aytıla beyanatta.

Meclisniñ vesiqasında aytıla ki, sentâbr 14-te saylavlarda iştirak etmege qarar alğan milliy idare organlarınıñ azaları qarar almaq kerekler.

Qırımtatar halqı Qurultayı ve Meclisiniñ qararına binaen, olar milliy idare organlarından çıqmaq niyetleri bar olğanını ariza yazıp, bildirmeleri kerek.

Meclis saylavlarda namzet köstermemek ve Qırım sakinlerine millet mensüpligine baqmadan, keçirilmesi sentâbr 14-ke belgilengen saylavlarnı boykot etmek qararını daa bir kere tasdıqladı.

Hatırlatamız, Remzi İlyasov Qırım Cumhuriyeti Devlet Şurasınıñ reis muavini, Teyfuk Gafarov Aqmescit şeer reisiniñ muavini, Zaur Smirnov ise Milletlerara munasebetler ve sürgün olunğan grajdanlarnıñ işleri boyunca Qırım Devlet komitetiniñ yolbaşçısı oldı.

XS
SM
MD
LG