Bir aftadan berli Bağçasaray rayonınıñ Tav Badraq (Skalistoye) köyüniñ merkeziy yolu çetinde tiklenilgen haç tura. Onı dos-doğru qırımtatar halqınıñ sürgünliginden evel olğan musulman mezarlığınıñ qarşısında tiklediler. Musulman cemiyeti haçnıñ başqa yerge avuştırılmasını talap etecek ola, dep haber ete QHA.
Agentlikniñ malümatına köre, haçnı er kün politsiya hadimleri qoruy. Aynı vaqıtta Tav Badraq köy şurası haç tiklenilmesi içün bir de bir ruhset vesiqalarını bermegen edi.
«Almin zavodınıñ müdiri (PAO «Qurucılıq malzemeleriniñ Alman zavodı» reisi Yuriy Lovâgin – muarrir) bu haçnı bıltır sımarlağan edi, ğaliba. Ve onı mında tikleycek oldı. Lâkin bizler razı olmadıq, bundan soñ mesele qaldırıldı. Soñki sessiyada ise keşişhane yol işareti aqqında mesele baqıldı, haç aqqında bir şey aytılmadı. Bizler razı oldıq, böyle bir işaret olmalı. Neticede olar ise bu haçnı tiklediler», – dep añlattı köy şurasınıñ deputatı Remziye Kerimova.
Onıñ qayd etkenine köre, haç eski musulman mezarlığından 3-4 metr mesafede yerleşe.
«Şimdi köy şurası Aqmescitke, yadikârlıqlarnı qoruv ve medeniyet bölügine muracaat etti. Andan kelgen malümatqa köre, böyle bir mezarlıq yoq. Lâkin, mencesine, cenkten soñ bütün mezarlıqlarnı cedvelge almadılar, şimdi men deputat olaraq Bağçasaray qoruğına muracaatta bulundım», – dedi deputat.
Onıñ bildirgenine köre, köy şurası haç tiklenilmesi içün bir de bir ruhset vesiqalarını bermegen edi, topraq damartısı ayırılmadı.
Tav Badraq musulman cemiyeti haçnı başqa yerge avuştırmağa talap etecek. Faaller ise mında eski mezarlıq yerleşkenini tasdıqlağan vesiqalarnı toplaycaqlar.
