Link açıqlığı

Saatnıñ esas haberi

Ukraina tış işler naziri Qırımnıñ qaytarılması aqqında: başta bizler mahsulatnı yolladıq, soñra özümiz de kirecekmiz


Ukraina tış işler naziri Pavlo Klimkin Qırım kene de ukrain olacağını vade ete, Rusiye tarafından işğal etilgen yarımada sakinlerine ise şübelenmemege ve sabır etmege rica ete.

Bunı o Qırım sakinlerinden birine avgust 24-te Kiyevde Ukrainanıñ Mustaqillik Kününe bağışlanğan tantanalı tedbirlerde ayttı.

Qırımlı qadın bu subet aqqında Qırım.Aqiqat saytındaki blogında bildirdi.

«Qırımlılar sizge işanalar. Siz, lütfen, toqtamañız», – dedi Qırım sakini Klimkinge. O ise, böyle cevap berdi: «Şübelenmeñiz. Men endi aytqan edim: başta bizler mahsulatnı yiberdik, soñra özümiz de kirecekmiz. Men söz berem. Sizler, eñ esası, sabır etiñiz».

Aynı böyle eminliknen nazir Qırımnıñ siyasiy mabüsleri Oleg Sentsov, Oleksandr Kölçenko ve yaqalanğan diger Ukraina vatandaşlarınıñ Rusiyeden Vatanğa qaytarılması aqqında ayttı.

«Bizler Olegni mıtlaqa çıqaracaqmız. Ve başqalarını da», – dep ayttı o.

Mart 16-da Qırımda Rusiye Federatsiyasınıñ arbiy ve siyasiy yardımı ile anayasağa uymağan ve dünyada tanılmağan referendum keçirildi. Öz başına ilân etilgen Qırım akimiyetiniñ malümatına köre, rey bergenlerniñ 96,77% Qırımnıñ Rusiyege qoşulmasına qol tuttı. Ukraina ve Ğarp Rusiyeni Donbasstaki boyeviklerge yardım etmesinde qabaatlay. Moskva ise bunı red ete.

XS
SM
MD
LG