Rusiye daa bir gumanitar konvoynı azırlamaq niyeti aqqında Ukrainağa bildirdi, dep ayttı Rusiye tış işler naziri Sergey Lavrov Moskvadaki brifingde, haber ete İnterfaks.
«Bizler eñ yaqın vaqıtta aynı yol, aynı tarzda, ukrain sıñırcıları ve gümrükhane hadimleriniñ iştiragi ile ekinci konvoy ketirilmesi aqqında añlaşacaq olamız», – dedi Lavrov.
«Eminmiz, bunı bu afta yapmaq kerek», – dep qayd etti Rusiye tış işler nazirliginiñ yolbaşçısı.
Rusiyeniñ gumanitar yardımı ile avtokolonna avgust 12-de Moskva civarındaki Naro-Fominskten Ukrainağa yol aldı. Bu yükni avgust 15-te Rusiye-Ukraina sıñırında «Donetsk» kiriş noqtasında (Rostov vilâyeti) baqıp başladılar.
Avgust 22-de Rusiye kolonnası Qızıl Haç hadimleri olmağanda ve ukrain tarafı razılıq bermegende Luganskqa taba areket etip başladı. Rusiye tış işler nazirligi işbu qarar, Moskvanıñ zanınca, yükni resmiyleştirüv vaqtı sebepsiz sozulğanı içün qabul etildi, dep bildirdi. Ertesi künü, avgust 23-te, yük maşinaları Rusiyege qaytıp keldiler.
Ukrain tarafı avtokolonna areketlerini añlaşma şartlarını bozuv olaraq, Ukraina havfsızlıq hızmetiniñ reisi Valentin Nalivayçenko ise «dos-doğru» istilâ dep tanıdılar.
