Moskvanıñ Lefortov mahkemesi avgust 25-te ukrain rejissöri Oleg Sentsovnıñ cinaiy işini ğayrıdan baqacaq. Onı Qırımda bir sıra terakt azırlamasında qabaatlaylar, dep haber ete Azatlıq Radiosı.
Bazarertesi künü mahkemeciler adliyecilerniñ şikâyetlerini baqmaq kerekler. Berilgen malümatqa köre, Sentsovnıñ adliyecilerine taqiqat malümatlarınıñ bir qısmı berilmedi. Olarsız ise bir sıra ekspertiza ve tedqiqlerni keçirmek imkânsızdır.
Adliyecilerniñ şikâyeti boyunca toplaşuv eki kere qaldırılğan edi. Keçken toplaşuvda apske alınğan rejissör taqiqatçı ve prokurornı bu esnasta mustaqil sımalar olaraq tanımağanını bildirdi. Bundan ğayrı, olarnı «cinaiy rejimge hızmet etüvde» qabaatladı.
Sentsovnı Rusiyeniñ FSB hadimleri mayıs 11-de Qırımda yaqaladılar. O künden berli o apste buluna. Onı Aqmescit, Yalta ve Aqyarda yarımadada siyasiy vaziyetni kerginleştirmek maqsadında yapılacaq teraktlarınıñ teşkil etilmesinde şekleyler. Sentsovnı 20 yılğa qadar azatlıqtan marum qaldıra bileler. Oleg Sentsovnı «siyasiy mabüs» olaraq tanığan işdeş ve uquq qorçalayıcıları onı azat etmege rica eteler. Olarnıñ fikirince, oña qarşı qabaatlar uydurılğan, onı ise grajdanlıq mevamı sebebinden yaqaladılar.
Ukraina prezidenti Petro Poroşenko Oleg Sentsovnı ve Rusiyede apste olğan uçucı Nadejda Savçenkonı «Mertlik içün» ordenlernen taqdirledi.
