Ukrainliler dünyanıñ bir çoq köşesinde Mustaqillik Kününi farqlı-farqlı aktsiyalarnen qayd ettiler. Bunı ukrain diasporasınıñ VIDIA media-portalı bildire, dep haber ete Azatlıq Radiosı.
Böylece, Parijde ukrainliler Yelisey alanlarında büyük bir trizubnı yaptılar. Pragada ukrainliler meşur Karlov köpürinden Vltava özenini keçip, balaban bir bayraqnı alıp kettiler.
Varşavada ukrainliler tantanalı yürüş keçirdiler, Kölnde köpürni mavı ve sarı tüslernen boyaladılar, bundan ğayrı, Milan, Roma, Vilnüs, Detroyt ve Şanhayda bayramnı qayd ettiler.
Moskvadaki Kremlniñ yanında aktsiya çoqqa sürmedi. Politsiya hadimleri köpürde on metrlik bayraqnı asmağa bermedi ve beş faalni yaqaladılar.
