Milleti qırımtatar olğan ukrain yırcısı Jamala «Ukraina. Yürekte iman» içtimaiy leyhasında iştirak etti.
İşbu leyha çerçivesinde «Ukraina» telekanalınıñ efirine ukrain şou-biznes yıldızlarınıñ iştiragi ile dört levha çıqacaq.
Belli ukrainliler zemaneviy ukrain şairleriniñ memleketteki soñki adise-vaqialarına bağışlanğan şiirlerni oqudılar. Jamala İrina Tselikniñ «Sağ qayt» şiirini ayttı.
Jamaladan ğayrı, leyhada aktör Ostap Stupka, yırcı Nina Matviyenko ve «Krıhitka tsahes» rok-taqımınıñ solisti Oleksandra Koltsova iştirak ettiler.
«Bizim içün – bu ğayet unikal bir içtimaiy leyha, mında ukrain artistleri ve «Ukraina» kanalı kreativ gruppasınıñ icadı, istidatı ve tecribesi birleştiler. Yayınlar arasında çıqacaq levhalar vastasınen bizler adamlarnıñ menfiy emotsiyalarını yeñmege tırışacaqmız, ve bugünki vaziyette eñ esası – kendine, küçüne, ve barışıq olacağına ümütten vazgeçmeycegini hatırlatmaqtır», – dep ayttı «Ukraina» kanalınıñ brend ve mahsulat ilerileme departamentiniñ müdiri Olga Şevçenko.
Qırım.Aqiqat malümatına köre, qırımtatar yırcısı Jamalanıñ iştiragi ile «Povodır» filmi noyabrniñ 12-den itibaren kinoteartlerde kösterilecek.
