Link açıqlığı

QMDİ: Qırımdaki parallel müftiyat akimiyetniñ Qırım musulmanlarını bölmek ıntıluvıdır


Qırımda parallel müftiyat – «Tavriya müftiyatı – Qırım musulmanları Merkeziy diniy idaresi» akimiyetniñ Qırım musulmanlarını bölmek daa bir ıntıluvı ola bile. Böyle bir fikirni Qırım musulmanları Diniy idaresiniñ (QMDİ) reis muavini Ayder İsmailov seslendirdi.

Onıñ qayd etkenine köre, şimdilik «Tavriya müftiyatınıñ» meydanğa ketirilmesi aqqında malümat tasdıqlanmadı, lâkin böyle bir şey olsa, Rusiye akimiyeti mında öz issesini qoştı, dep yaza 15 minut neşiri.

«Bu adım Qırım musulmanları Diniy idaresini zayıflatıp, başqa bir idarege deñiştirmeknen bağlı. Ve, elbet de, Qırım akimiyeti, belli bir strukturalar ve bu alemniñ eñ küçlüleri Qırım musulmanlarını bölmege tırışalar», – dep qayd etti İsmailov.

Onıñ bildirgenine köre, yañı teşkilâtnıñ müftisi olaraq saylanğan Ruslan Saitvaliyev Ukraina musulmanları Diniy idaresiniñ bölügi olğan QMDM reberlerinden biri edi.

«Tavriya müftiyatı», kerçekten de, peyda olsa, demek ki, Qırım musulmanları Diniy merkezi yalıñız adını deñiştirdi, içi ise kene de habaşizmnen bağlı olıp qala», – dep tüşüne İsmailov.

Qırım musulmanları Diniy idaresi içün yañı «müftiyat» aslı beklenilmegen bir şey olmadı.

«20 yıl devamında qırımtatar halqını diniy sebeplerden bölmege tırıştılar. Onıñ içün biz alıştıq, körgenimiz kibi, er şey keçe. Bizim halqımız pek ikmetli, onıñ içün «Tavriya müftiyatı» kibi adlarnen olarnı aldatmazsıñ», – dep ayttı Qırım müftisiniñ muavini.

Hatırlatamız, Qırımda Qırım musulmanlarınıñ merkeziy diniy idaresi peyda oldı – Tavriya müftiyatı. İşbu qarar Aqmescitte yarımadanıñ farqlı rayonlarından 100 delegatnı toplağan musulman qurultayında qabul etildi.

Müfti olaraq Ruslan Saitvaliyev saylandı, reis vazifesine Enver Ahtemov tayin etildi. Rusiye musulmanlarınıñ merkeziy diniy idaresiniñ yolbaşçısı müfti Talgat Tacuddin Müftiyat tiklenmesine yardım etti.

XS
SM
MD
LG