İşğal etilgen Qırım «akimiyetiniñ» Keriç limanı ve Haydarpaşa Türkiye limanı arasında halqara parom alâqalarınıñ başlanmasını ilân etti. Öz başına ilân etilgen Qırım ükümetiniñ «ruporı» «Krıminform» saytınıñ malümatına köre, Haydarpaşa – Keriç – Novorossiysk ağındaki parom avgustnıñ 22-de ilki seferni eda etecek.
Rusiyede ve SNG memleketlerinde ticaret ve marketing boyunca «Transcamion» agentliginiñ meneceri Arsen Çukin bildirdi ki, Haydarpaşi – Keriç yolu 24 saat sürecek. Parom 105 maşinanı sığdıra bile.
«Şimdi paromnı faal sürette tolduralar, bugün sefer ötkerilecek», – dedi Çukin.
«Transcamion» agentliginiñ malümatına köre, ileride Novorossiysk paromı gece-kündüz toldurılacaq. Keriçte eñ çoq 6 saat beklemek kerek, sefer vaqtı – tahminen bir saat.
16,5 metrlik avtotren keçirilüviniñ fiyatı 1350 dollarnı teşkil etecek ve 950 dollar Keriç-Haydarpaşadan keçmek içün, – dep qayd ettiler agentlikte.
«Transcamion» malümatına köre, avgust 19-da Zonguldak – Keriç – Novorossiysk parom ağı işini toqtattı.
