İşğal etilgen Qırım «akimiyeti» avgustnıñ 22-de Lugansk ve Donetsk vilâyetleriniñ aman-aman 900 sakinini İrkutskqa yollaycaq ola. Qırım «ükümetiniñ» matbuat hızmeti bildire ki, bunı Qırım «Nazirler şurası» reisiniñ birinci muavini Mihail Şeremet ayttı.
Qıtaiy Ukrainadan köçip kelgen adamlarnı Qırımdan çıqaruv aqqında malümatnı Şeremet Aqmescitteki «Artek» musafirhanesinde yerleşken vaqtınca yerleştirüv noqtasını ziyaret etkende aydınlattı.
«Er kün aman-aman 500 insan kele. Bugün yarımadada vaqtınca yerleştirüv noqtalarında 10 biñ qaçaq buluna. Olarnı qıtağa yollav meselesi tolusınen çezildi. Bugün 900 insan İrkutsk şeerine yol alacaq, çünki andaki şaraitler bayağı yahşıdır», – dedi Mihail Şeremet.
Onıñ bildirgenine köre, qaçaqlar baracaq regionnı özleri saylay bileler. Amma kene de er kes Qırımdan ketmege razı olmağanını gizlep olamadı.
Qırım «baş nazirini birinci muavini» dedi ki, «bugünde bugün yarımada çoq qaçaqnı qabul etip olamay, çünki olarğa içtimaiy kefiller berilmeli».
