Link açıqlığı

Saatnıñ esas haberi

Qırım alan missiyası: Qırımtatarlarğa matem mitingni keçirmek yasağı Rusiye qanunlarını bile boza


Qırımtatarlarğa avgust 23-te Aqmescitte Bütünavropa stalinizm ve natsizm qurbanları hatırasına bağışlanğan matem mitingni keçirmek yasağı Rusiye qanunlarını bile boza.

Bunı Qırım alan missiyasınıñ eksperti Vissarion Aseyev bildirdi, dep haber ete teşkilâtnıñ matbuat hızmeti.

«Bu yalıñız insan aqları boyunca Avropa konventsiyasınıñ 11 maddesini (toplaşuv ve birleşme serbestligi) degil de, Rusiye qanunlarını da çirkin bir şekilde boza. RF Federal qanunınıñ «Toplaşuv, miting, numayış, yürüş ve piketler aqqında» 12 maddesiniñ 3-ünci qısmında aytıla ki, ariza bergen adamnıñ işbu qanunda qayd etilgen sebepler boyunca buña aqqı olmasa, akimiyet organı tedbir keçirilmesini yasaq ete bile. Bundan ğayrı, arizada qayd etilgen tedbir yeri cemaat tedbirleri içün uyğun olmağan bir yer olsa, tedbir keçirilmesine ruhset berilmey», – dep ayta uquq qorçalayıcı.

Qırımtatar Milliy Meclisiniñ kâtibiyet reberi Dilâver Akiyev bildirdi ki, avgustnıñ 13-de Aqmescit şeer şurasına aktsiya keçirilmesi aqqında haber ettiler.

10 kün keçken soñ ise akimiyet mitingni yasaq etip, sıcaq avanı sebep olaraq qayd etti.

«Ava sıcaq, adamlar yaramay bile. Bizler eali sağlığına zarar ketirecekmiz, onıñ içün miting keçirilmesine izin bermeyik», – dep añlattı mektüp mündericesini Dilâver Akiyev.

İnsan aqları boyunca Qırım alan missiyasınıñ malümatına köre, Meclisniñ nevbetteki toplaşuvında mezkür yasaq mahkeme üzerinden lâğu etilmesi muzakere etilecek.

Hatırlatamız, mayıs 18-de Qırım akimiyeti Aqmescit merkezinde qırımtatar halqınıñ sürgünlik qurbanlarınıñ hatırasına bağışlanğan ananeviy matem mitinginiñ keçirilmesini yasaq etti. İyünniñ 26-da ise şeer merkezinde qırımtatar bayraq kününi qayd etmege imkân bermediler.

XS
SM
MD
LG