Ukraina arbiyleri ve Rusiyege qol tutqan separatistler arasında eñ deşetli uruşlar olğan İlovaysk şeerine yardım etmek içün «Qırım» ayrı taqımı keldi.
«Bugün «Qırım» ayrı taqımından bizim qardaşlarımız İlovaysk civarında bulunalar, andaki vaziyet daa da kergin. Er keske dua etmege rica eteler!» , – dep aytıla olarnıñ Facebook resmiy saifesinde, haber ete Sobıtiya Krıma.
«Qırım» adlı taqım esasen qırımtatarlardan ibarettir, dep yaza neşir.
Hatırlatamız, al-azırda Donbassta strategik bir şeer İlovaysk içün qıyın uruşlar ketmekte.
Şeerniñ bir qısmı «Donbass» batalyonı ve «Dnepr» batalyonınıñ nezareti altında qala.
Rusiyege qol tutqan separatistler ve Rusiye ordusınıñ arbiyleri tank ve artilleriya vastasınen olarğa ücüm eteler.
