Petro Poroşenko Ukraina prezidentiniñ qırımtatar işleri boyunca vekili vazifesine tayin etken Ukraina halq deputatı Mustafa Cemilev ve Qırımtatar Milliy Meclisiniñ reisi Refat Çubarov Latviyağa yol alıp, evelden planlaştırılğan körüşüvlerden ğayrı, apishaneni ziyaret ettiler.
Şu cümleden, olar Rigadaki Latviya SSR KGB içki apishanesiniñ «kezinti azbarını» ziyaret ettiler.
Bunı Qırımtatar Milliy Meclisiniñ reisi Refat Çubarov bildirdi.
«Mustafa ağa Özbek SSR KGB apishaneleri (Taşkent) ve SSSR KGB apishaneleriniñ (Moskva, Lefortovo) şaraitlerini qıyaslay», – böyle etip Refat Çubarov fotonı izaatladı.
Meclis reisi ise bir vaqıtları reberlik yapqan Latviya devlet arhivini ziyaret etti.
«23 yıldan soñ – kene de zenaat boyunca çalışqan eñ meraqlı vaqıtlarım keçken devlet arhiviniñ rafları yanında. Men bu topraqnı kerçekten de sevdim, lâkin daa ziyade – onıñ serbestsever halqını. Aynı bu yerde, Latviyada, men birinci siyasiy adımlarımnı atqan edim», – dep qoştı Çubarov.
Latviyada Meclis reisi yerli kütleviy haber vastalarına intervyü berdi.
