Adet üzre müim bir tayinlevler qırımtatarlarnıñ temsil organı ile muzakere etilse de, qırımtatar halqınıñ lideri Mustafa Cemilevge Ukraina prezidentiniñ vekili statusınıñ berilmesi Qırımtatar Milliy Meclisiniñ toplaşuvında baqılmadı.
Bunı Meclis reisiniñ muavini Nariman Celâl Qırım.Aqiqatqa bildirdi. O şunı da qayd etti ki, olıp keçken vaqia Meclis printsiplerine uyğun kele.
«Mında qırımtatarlarnıñ lideri, Ukraina halq deputatı aqqında laf kete. Onıñ Ukraina prezidentiniñ vekili vazifesinde bulunmaq razılığı Meclis printsiplerine qarşı degil», – dep qayd etti Celâl.
Onıñ aytqanına köre, şimdilik mezkür adımnıñ aqibetlerini tahmin etmek zordır, çünki vekilge berilecek imkân ve vazifeler belli degil.
«Mustafa Cemilev farqlı statuslarda olıp, er daim qırımtatar halqınıñ menfaatlarını qorçalay edi. Ümüt etem ki, yañı resmiy status oña areketlerini quveteştirmege imkân berecek», – dedi Celâl.
Malüm ki, tünevin Ukraina prezidenti Petro Poroşenko Mustafa Cemilevni qırımtatar halqınıñ işleri boyunca Prezident vekili olaraq tayin etti. Devlet yolbaşçısınıñ işbu № 657/2014 buyruğı Ukraina prezidentiniñ saytında derc etildi.
