Dersleri qırımtatarca keçirilgen 6 mektep «Ramazan-2014» hayriye aktsiyası çerçivesinde gumanitar yardımnı aldı. Aktsiya Qırım musulmanları Diniy idaresi, Qırım musulmanları fondu, «Kimse Yokmu Derneği» Türkiye hayriye fondu tarafından Seydişehir Qırımtatar Derneginiñ qol tutuvınen teşkil etile, dep haber ete QMDİ matbuat hızmeti.
Böylece, avgustnıñ 18-de Qarasuvbazar rayonınıñ üç mektep hadimleri yardımnı elde ettiler. Bunıñnen beraber, Sudaq mektebi ve Eski Qırım mektebi 45 ve 63 aşayt mahsulat paketlerini aldılar.
Avgustnıñ 20-de hayriye aktsiya Kezlevde keçirildi. Bundan ğayrı, 68 paket Kezlev rayon imamı Eskender Memetovğa Kezlev şeeri ve İsmail-bey qasabasınıñ yardımğa muhtac olğan musulman qorantalarına berilmesi içün qaldırılğan.
Aktsiyanı Curçı, Qurman, Canköy, İçki, Bağçasaray ve Aqmescit rayonlarınıñ qırımtatarca oqutqan mekteplerinde devam ettirmege planlaştıralar.
Hayriye aktsiya çerçivesinde 700 aşayt paketini dağıtacaq olalar.
Qayd etmeli ki, aktsiya bu yılnıñ iyül ayında başlandı.
