Link açıqlığı

İşğal etilgen Qırım sakinlerine eñ yaqın vaqıtta Rusiye çetel pasportlar berilecegini vade eteler. Bunı Qırımnıñ öz başına ilân etilgen baş naziri Sergey Aksönov avgustnıñ 21-de bildirdi.

Qırım «ükümetiniñ» matbuat hızmeti bildire ki, bunı Aksönov Federal migratsion hızmetiniñ «Bir saat içinde pasport» pilot leyhasınıñ açılışından soñ Aqmescitte keçirilgen brifingde ilân etti.

«Eñ yaqın vaqıtta bizler Federal migratsion hızmeti ile beraber cumhuriyette çetel pasportlar berilmesini planlaştıramız. Sentâbr ayında Qırım ükümetiniñ saytı ve migratsion hızmetiniñ Qırım bölügi saytında çetel pasportlarnı aluv imkânları, em de kerek olğan vesiqalar cedvelini derc etecekmiz», – dep qayd etti Sergey Aksönov.

İşğal etilgen Aqyar sakinlerine çetel pasport içün vesiqalarnı küzde qabul etecekler, dep bildirgen ediler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG