Link açıqlığı

Qırımtatar halqınıñ işleri boyunca Prezident vekili vazifesine tayin etilgen Mustafa Cemilev bildirdi ki, yarımadağa barmayıp, yañı vazifelerni becermek ğayet qıyın olacaq. Malüm ki, Qırımtatar Milliy Meclisiniñ reisi Refat Çubarovğa da Qırımğa kelmek yasaqtır, dep haber ete Yespreso.TV.

«Qırımtatar halqınıñ işleri boyunca Prezident Vekiliniñ vazifeleri daa tasdıqlanmağan, lâkin leyhası endi bar. Vekilniñ esas vazifesi qırımtatar halqınıñ problemlerini çezecek bir sıra vesiqalar leyhasını azırlamaqtan ibarettir. Em uquqiy, em de içtimaiy», – dedi Cemilev.

«Lâkin Meclis azaları muntazam sürette Kiyevge kelip keteler. Bizler er şeyden haberdarmız. Belki de, Vekil Qırımnı azat etmek içün faydalanacaq usullarnen Prezidentnen paylaşacaq», – dep ayttı o.

Cemilevniñ bildirgenine köre, birinci esas mesele – yarımadanı mecburen terk etken Qırım sakinlerini qıtaiy Ukrainada yerleştirüvdir.

O şunı da qayd etti ki, ileri planlarını muzakere etmek içün prezident Poroşenko ile eki körüşüv ötkerildi.

«Körüştik... yañı vazife aqqında buyruq imzalamaqtan evel. O, menim razılığımnı soradı. Men diger namzetlerni teklif ettim, lâkin o bu vazifede tanış bir insannı körmek istegenini bildirdi. Ve men razı olmağa mecbur edim», – dep añlattı Cemilev.

Tünevin Ukraina prezidenti Petro Poroşenko Mustafa Cemilevni qırımtatar halqınıñ işleri boyunca Prezident vekili olaraq tayin etti.

Devlet yolbaşçısınıñ işbu № 657/2014 buyruğı Ukraina prezidentiniñ saytında derc etildi.

XS
SM
MD
LG