Bağçasaray şeer şurasınıñ «Qurultay-Ruh» deputatları sessiyanı bozmadılar. Olarnıñ sayısı 11 adamnı teşkil ete, yani halq temsilcileriniñ yalıñız 25%. Bunı Bağçasaray regional Meclisiniñ reisi Ahtem Çiygoz bildirdi.
Onıñ aytqanına köre, tünevin ötkerilgen sessiyağa «Qurultay-Ruh» fraktsiyasınıñ 11 deputatı kelmedi, deputatlar erkânı ise 44 adamnı teşkil ete, dep haber ete Qırım «akimiyetiniñ» ruporı «Krıminform».
«Bağçasaray şeer yolbaşçısı (Konstantin Rubanenko – muarrir) dedi ki, «Qurultay-Ruh» fraktsiyası sessiya ötkerilmesine imkân bermedi. Bu kene de şeer yolbaşçısınıñ deputatlar arasında itibarı olmağanı, ve onıñ vazifelerini becerip olmağanını isbatlay. Tünevinki toplaşuvda olmağan deputatlarnı men bilmeyim. FSB nezareti altında sessiya toplamaq – daa bir nonsens», – dep ayttı Çiygoz.
Bağçasaray rayon devlet memuriyetiniñ sabıq reisi İlmi Ümerov dedi ki, avgustnıñ 20-de sessiya bozuluvında Regionlar firqası sabıq fraktsiyasınıñ deputatları da iştirak ettiler.
«Olar er vaqıt böyle qatnaylar. Bizim «Qurultay-Ruh» fraktsiyasınıñ 11 deputatı qayd etilmedi ve kvorum olmadı. Deputatlar toplaşuvnı yapacaq olsa ediler, onı yapar ediler», – dep qayd etti o.
Avgustnıñ 20-de Bağçasarayda şeer şurasınıñ sessiyası ötkerilmedi, çünki kvorum yoq edi. Bağçasaray şeer yolbaşçısı Konstantin Rubanenko «Qurultay-Ruh» fraktsiyasınıñ deputatlarını qabaatlap, kelecek sessiyağa FSB hadimlerini davet etti.
Aksönov şeer şurası sessiyasınıñ bozuluvını şahsen ögrenecek ola.
