Cumaertesi künü, avgustnıñ 23-de, Aqmescitte Qırımtatar Milliy Meclisiniñ toplaşuvı ötkerilecek. Tedbirde Qırım akimiyeti ile işbirlik tutqan azalarını Meclisteki vazifelerinden vazgeçmege çağıracaqlar.
Bu aqqında 15 minut saytı Mecliste olğan qaynaqlarğa esaslanıp bildire.
Milliy Meclis toplaşuvında eki esas mesele baqılacaq. Olardan biri Devlet şurası ve Qırım akimiyet organlarınıñ saylavlarınen bağlı olacaq. Malüm ki, qırımtatar halqınıñ temsil organı mezkür saylavlarda iştirak etmeycegini bildirdi.
Kün tertibiniñ ekinci meselesi kadrlarnen bağlı olacaq. Meclis azaları yerli akimiyet ile işbirlik yapqan işdeşleriniñ areketlerine qıymet kesecekler.
Böylece, reis muavini Zaur Smirnov ve uquq idaresiniñ reberi Teyfuk Gafarov Mecliste yapqan işlerinden vazgeçe bileler. Malüm olğanı kibi, Gafarov bu afta Aqmescit şeer yolbaşçısınıñ muavini vazifesine tayin etildi.
Hatırlatamız, Qırımtatar Milliy Meclisi Zaur Smirnovnıñ namzetini Milletlerara munasebetler ve sürgün olunğan grajdanlarnıñ işleri boyunca Cumhuriyet komitetiniñ yolbaşçısı vazifesine teklif etse de, birazdan, daa doğrusı bu yılnıñ iyül ayında, öz qararını lâğu etti. Buña baqmadan Smirnov bugünge qadar bunı yapmadı.
15 minut saytınıñ subetdeşi bildire ki, meclis azaları saflarından çıqarmaq aqqı yalıñız Qurultayda bar. Onıñ içün Gafarov uquq bölüginde vazifesinden marum qalacaq, Smirnov ise – Meclis reisiniñ muavini vazifesindendir. Demek ki, ekisi de Meclis prezidiumınıñ azaları olmaycaqlar.
