Kelecek sene devamında Qırım nefaqacıları «Nefaqa Fonduna» arttırılğan nefaqağa aqqları bar olğanını tasdıqlağan vesiqalarnı teslim etmek kerekler.
Bunı Qırım «Nefaqa Fondunıñ» reberi Marina Şçerbina Aqmescitte matbuat konferentsiyasında bildirdi, dep haber ete Qırım «akimiyetiniñ» ruporı «Krıminform».
2015 senesi yanvarniñ 1-den başlap qırımlılar nefaqa arttırılması içün buña zarur olğan vesiqalarnı Nefaqa Fonduna teslim etecekler.
Böyle bir şart işğal etilgen Qırımda yaşağan Rusiye vatandaşlarını nefaqanen teminlev hususiyetleri aqqında qanunda qayd etilgen.
Şçerbinanıñ aytqanlarına köre, böyle bir aqnı tasdıqlağan vesiqalar 2015 senesi dekabr ayında berilse de, nefaqa miqdarı kelecek sene yanvarniñ 1-den başlap arttırılacaq.
