2015 senesi yanvarniñ 1-den başlap işğal etilgen Qırımda eki baladan ziyade olğan qorantalar içün devlet qol tutuv programmaları olacaq.
Bunı Aqmescitte «Nefaqa fondunıñ» yolbaşçısı Marina Şçerbina matbuat konferentsiyasında bildirdi.
Federal qanunğa binaen, programma Rusiye vatandaşları içün çalışa ve 429 biñ 408 ruble miqdarında bir kerelik tölevni nazarda tuta, dep yaza KİA.
«Ailede 2007 senesinden 2016 senesine qadar ekinci bala doğsa, olar evni satın almaq ya da qurmaq, bala tasili ya da anasınıñ emek nefaqasınıñ tolduruv qısmı şekillendirilmesi içün devletten yardım ala bileler», – dep añlattı Şçerbina.
«Nefaqa fondunıñ» yolbaşçısı bildirdi ki, balalarnı alğan qorantalarğa da yardım kösterile, ana-babasız qalğan balalar ise 23 yaşına qadar para saibi olmaları mümkün.
Bala üç yaşını toldurğan soñ, maddiy yardım almaq içün yaşağan yerge köre Nefaqa fonduna muracaat etmek kerek.
Qırım içün programma hususiyetleri daa muzakere etile, bir de bir deñişmeler olmasa, 2015 senesi yanvarniñ 1-den başlap Qırım sakinleri Rusiyeniñ diger vatandaşlarınen bir sırada yardım ala bilecekler.
