Qazan halqara musulman kino festivali «Merametli qırmısqa» adlı qırımtatarca azırlanılğan mülfilmden başlanacaq.
Bu aqqında festivalniñ art-müdiri Albina Nafigova ayttı, dep haber ete Qırım «akimiyetiniñ» ruporı «Krıminform».
Mültfilm festivalniñ «Animatsion film» qısmınıñ yarış programmasını açacaq.
Nafigovanıñ aytqanına köre, bu mültfilm «Qırımnıñ Rusiyege qoşulmasından soñ» qırımtatar ve tatar animatsion kino ustalarınıñ beraber yapqan işidir.
Film milliy üslüpte yapılğan: qaramanlar qırımtatar milliy qıyafetlerde, masal ormanınıñ terekleri ise ananeviy nağışlarnı añdıra.
Yarış programmasına Turkiye, Portugaliya, İraq, Büyük Britaniya, İran ve Rusiyeniñ 10 animatsion filmi kirdi.
«Bir çoq film biri-birine oşamağan üslüpte yapılğan, mence, jüriniñ işi zor olacaq, seyirciler ise bu levhalarnı baqıp, büyük teessuratlar alacaqlar», – dep añlattı art-müdir.
Qazandaki halqara musulman kino festivali 2005 senesinden berli keçirile. Bu sene tedbir sentâbrniñ 5-11 künleri keçirilecek. Ekseriyette festival iştirakçileri Avropa ve Asiya kinematografnı temsil etken rejissörlar ola.
