Bağçasaray rayonınıñ Tav Badraq köyü (Skalistoye) yolunda sürgünlikten evel musulman mezarlığı yerleşken yerde haçnı tiklediler.
Bunı Qırım.Aqiqat mühbirine Qırımtatar halqı Qurultayınıñ delegatı, Bazarçıq (Poçtovoye) regional meclisiniñ reisi Elver Usmanov bildirdi.
Onıñ aytqanına köre, haçnı tiklemek teşebbüsi «Devlet şurası» deputatları Vasiliy Rogatin, Dmitriy Rogaçöv, Tav Badraq köy şurasınıñ yolbaşçısı Aleksandr Semönov, «Almiyskiy zavod stroymaterialov» idare reisi Yuriy Lovâginge ait. Bunı tahtada yazılğanlar tasdıqlay.
«Bizler köy aqsaqalları ve sürgünlikten evel mında yaşağan qırımtatarlarnıñ aytqanlarına esaslanıp, bu yerde eski musulman mezarlığı yerleşkenini bilemiz. Bunı tasdıqlağan eski haritalar mevcut», – dep ayttı Elver Usmanov.
Onıñ bildirgenine köre, başta yolda yalıñız keşişhane işaretini qoyacaq ediler. Lâkin Tav Badraq köy şurası deputatlarınıñ toplaşuvında qırımtatarlar olmağanından sebep haçnı tiklemege qarar alınğan eken.
Qurultay delegatınıñ fikirince, böyle etip deputatlar «Devlet şurası» saylavları arfesinde piarnen oğraşalar. Bir qaç künden berli haçnı politsiya hadimleri qoruy.
«Yalıñız qırımtatarlar degil de, slavânlar da açuvlandı. Şimdi bizler sakinlerniñ imzalarını toplaymız, soñra sakinler arasında soraştıruv keçirecekmiz, em de anda mezarlıq yerleşkeniniñ delillerini toplaycaqmız», – dep bildire regional meclis reisi.
Onıñ aytqanına köre, bunıñnen bağlı malümatnı er instantsiyağa yollaycaqlar: «Devlet şurası», «prokuratura», «Qırım nazirler şurası», em de «DPS», çünki o yol boyun tura, yolnıñ ise bir sıra çuqurı bar – haçnı apansızdan urıp tüşürmek, ya da maşinanı bozmaq mümkün.
