Bağçasaray rayon devlet memuriyetiniñ reisi vazifesinden ketken İlmi Ümerov bildirdi ki, bu adım yalıñız onıñ teşebbüsine ait. Ümerovnıñ aytqanlarına köre, bugünge qadar o Ukraina devlet hızmetçisi olaraq çalışmağa devam etti, «çünki Qırımda keçici müddet bar».
«Rayonnı teminlev meselelerini çezip, men Rusiye Federatsiyası qanunlarına esaslanıp tizilgen vesiqalarda qol qoymaq kerekim. Men Qırım işğalini tanımayım ve ömür printsipleriniñ bozulmasını talap etken yañı şaraitlerde çalışıp olamayım. Men içki baqışlarım ve şimdiki akimiyetniñ resmiy mevamı arasında saylamaq kerek olğanda vazifemden ketecegimni gizlemey edim», – dep añlattı o öz qararını Qırım.Aqiqat saytına.
Umerovnıñ aytqanına köre, kendi qararı aqqında o evelden Sergey Aksönovğa haber etti.
«Uquqiy qıyınlıq şunda ki, bugün men Ukraina prezidenti adına ariza yazıp olamayım, lâkin aynı prezident qararınen bu vazifege tayin etilgen edim. Men bulunğan şaraitlerge köre areket ettim», – dep ayttı İlmi Ümerov.
Onıñ yerini kim alacaq belli degil.
«Men istifağa çıqqan soñ menim birinci muavinim vazifelerimni eda etip başlay – Galina Pehar. Soñra – Aksönov tayin etecek», – dedi o.
Bağçasaray rayon şurasınıñ reisi Zamir Haybullayevniñ aytqanına köre, rayon yolbaşçısı rayon devlet memuriyetiniñ bölükleri, yerli idare organlar, müessise, teşkilât ve rayon hızmetleriniñ reberleri ve hadimleri ile toplaşuvda ilân etti.
İlmi Ümerov soñki on yıl devamında Bağçasaray rayon devlet memuriyetiniñ reisi olaraq çalıştı.
Onıñ istifağa çıqmaq qararı aqqında Bağçasaray rayon devlet memuriyetiniñ matbuat hızmeti avgustnıñ 19-da haber etti.
