Link açıqlığı

Moskvada Rusiye prezidenti yanında Qırım temsilciligi açıldı


Moskvada Rusiye Federatsiyasınıñ prezidenti yanında işğal etilgen Qırım temsilciligi açıldı. Bunı temsilcilik reisi Georgiy Muradov bildirdi, – dep haber ete Qırım «ükümetiniñ» matbuat hızmeti.

Onıñ aytqanına köre, temsilcilik uquq organları tarafından endi qayd etildi.

Muradov şunı qayd etti ki, Qırım temsilciligi Moskva ükümetiniñ binasında yerleşe.

«İcra akimiyetniñ federal organları, qanun çıqarıcı akimiyetniñ federal organları, Prezident memuriyeti, halqara teşkilâtlar ile işbirlik boyunca iş belgilenecek. Müim yöneliş olaraq Qırım Cumhuriyetiniñ menfaatlarında tışqı iqtisadiy faaliyet boyunca iş sayılmaqta», – dep qayd etti Georgiy Muradov.

Bundan ğayrı, «Qırımnıñ merkeziy kütleviy haber vastalarında ilerilerimesi» boyunca iş, em de siyasiy birleşmeler, firqa, cemaat teşkilâtları ile iş planlaştırıla.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG