İşğal etilgen Qırımda sentâbrniñ 15-ne qadar «Nazirler şurası» 2015-2017 seneleri içün inkişaf programmalarınıñ cedvelini belgilemek kerek. Böyle bir qarar avgustnıñ 19-da «Nazirler şurasınıñ» toplaşuvında qabul etilgen edi.
Qırım «iqtisadiyat inkişafı naziri» Svetlana Verbanıñ aytqanına köre, qabul etilgen qarar 2014 senesi devamında programma azırlaması boyunca qısqartılğan müddetni belgiley, çünki yanvarniñ 1-den başlap evelden qabul etilgen programmalarnıñ faaliyeti toqtatıla, – dep haber ete Qırım «ükümetiniñ» ruporı Krıminform.
Qararğa binaen, endiden soñ bütün programmalarnı Qırım «Nazirler şurası» tasdıqlaycaq.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
