Aqmescit şeer şurası «Qardaşlıq» cemaat teşkilâtına sıcaq ava olğanından sebep Bütünavropa stalinizm ve natsizm qurbanlarınıñ hatıra kününe bağışlanğan mitingni keçirmege yasaq etti.
Bunı Qırımtatar Milliy Meclis Kâtibiyetiniñ reberi Dilâver Akiyev bildirdi, dep haber ete 15 minut saytı.
Miting avgustnıñ 23-de Gurzufskaya soqağındaki «Salgirka» bağçasında yerleşken Qırımtatar halqınıñ sürgünlik qurbanlarınıñ hatırasına bağışlanğan memorial kompleksi yanında keçirilecek edi.
Dilâver Akiyevniñ aytqanına köre, avgustnıñ 13-de Aqmescit şeer şurasına haber berildi. Bugün cevap keldi.
«Ava sıcaq, adamlar yaramay bile. Bizler eali sağlığına zarar ketirecekmiz, onıñ içün miting keçirilmesine izin bermeyik», – dep añlattı mektüp mündericesini Dilâver Akiyev.
Bundan ğayrı, o qayd etti ki, şeer şurası miting keçirilmesi boyunca cevap bermege aşıqmay edi.
«Men bu cevapnı zornen aldım. Bizler avgustnıñ 13-de haber ettik. Qanunğa binaen, olar üç kün içinde cevap bermek kerek ediler. Cumaaqşamı künü (avgustnıñ 14-de) maña telefon etip, cuma künü kelmem mümkün olğanını bildirdiler. Men keldim, lâkin cevapnı reberlik imzalay edi, maña onı bermediler. Men tünevin keldim (avgustnıñ 18-de) cevap kene de reberlikte edi. Bugün kelsem, cevap daa avgustnıñ 15-de poçta üzerinden yollanılğanını ayttılar. Poçta vastasınen, tabiiy ki, biz daa bir şey almadıq», – dep qayd etti Akiyev.
Meclis azasınıñ aytqanına köre, qırımtatarlar stalinizm ve natsizm qurbanlarınıñ hatırasını qanunğa uyğun bir şekilde añacaqlar.
