Öz başına ilân etilgen Qırım «akimiyeti» Naqliyat nazirliginiñ «Yekâne naqliye müdirligi» ile beraber Keriç keçitinde Qırımğa keri qatqan maşinalarnı sıralarğa tizmek içün elektron nevbetni meydanğa ketirecek olalar, dep haber ete RBK Daily.
Keçit mümkün olğanı qadar çalışa, dep qayd ete neşir.
«Bir sutka içinde altı esas parom, em de eki demir yol platforması ve «Soçi 1» katamaranı eki tarafqa 80-den ziyade sefer yapıp, 4 biñer yengil maşina ve Aqmescit-Moskva ve Moskva-Aqmescit trenleriniñ 20 biñden ziyade yolcusını alıp kete. Eñ büyük nevbet Qırım çıqışında tizildi, aman-aman 1800 maşina beklep tura, endi 40 saat bekleydirler», – dep yaza neşir.
Naqliyat nazirliginiñ malümatına köre, avgustnıñ 13-de Keriç keçitinde qıyınlıqlar yüz berip başladı, keçken raatlıq künleri nevbette turğan maşinalarnıñ sayısı 2300 maşinağa qadar yetti.
Bazarertesi künü aqşam, kündüz ilân etilgen furtuna havfına baqmadan, bu sayını eksiltmege imkân oldı, lâkin nevbetini beklegen adamlar alâ daa içtimaiy ağlarda 40 saat devamında turğanına şikâyet eteler.
