Link açıqlığı

Medvedev Qırım fiyatlarını nezaret etmege avale etti


Rusiye Federatsiyasınıñ baş naziri Dmitriy Medvedev baş nazir muavini Arkadiy Dvorkoviçke aşayt mahsulatınıñ fiyatlarını nezaret etip, «problemli regionlar – Kaliningrad, Qırım ve Uzaq Şarqqa» ayrı diqqat ayırmağa emir etti.

Böyle bir avaleni baş nazir muavini Arkadiy Dvorkoviç baş nazir Dmitriy Medvedevniñ baş nazir muavinleri ile toplaşuvında aldı, dep haber ete öz başına ilân etilgen Qırım ükümetiniñ «ruporı» «Krıminform» saytı.

«Qıyın regionlar boyunca – alıp barılacaq tedbirlerni muzakere etecekmiz, vaziyetni nezaret etecekmiz. Tabiiy ki, bu vaziyette bizim içün qullanıcılarnıñ menfaatları pek müimdir, ve bir de bir acele qararlar qabul etkende, olarğa esaslanacaqmız», – dep qayd etti Dmitriy Medvedev.

Baş nazir muavini Dvorkoviç ise şunı qayd etti ki, «şimdilik bazarda ciddiy bir deñişmeler yoq, olar aslı yoq».

Onıñ aytqanına köre, aşayt mahsulatınıñ taşıyıcılar cedveli «bayağı arttı».

Rusiye Federatsiyasınıñ baş naziri Dmitriy Medvedev avgustnıñ 7-de ükümetniñ Rusiyege qarşı Ukrainağa nisbeten yapqanları içün ceza kirsetken memleketlerden ayrı aşayt mahsulatına yasaq kirsetilmesi aqqında qararını imzaladı.

Cedvelde Amerika Qoşma Ştatları, Avropa Birligi, Yaponiya, Kanada, Avstraliya ve Norvegiyanıñ süt, et, sebze mahsulatı qayd etildi. Bir kün ögüne bunıñ kibi cezalar kirsetilmesini prezident Vladimir Pütin talap etti.

XS
SM
MD
LG