Link açıqlığı

İşğal etilgen Qırımda musulman baştaşlarından qurulğan evlerni taptılar


Aluşta civarındaki Körbek köyünde sovetler zamanında ev qurulmasına işletilgen musulman baştaşları tapıldı.

Bunı Aluşta şeer şurasınıñ milletlerara munasebetler icra komitetiniñ bölük yolbaşçısı Umer Çabanov bildirdi, dep haber ete 15 minut.

Memurnıñ aytqanlarına köre, avgustnıñ 8-de 1944 senesi viran etilgen eski musulman mezarlığında yerli sakinler ve Aluşta aqsaqallar Şurasınıñ vekilleri bir sıra baştaşnı taptılar, em de aman-aman dağılıp ketecek evniñ divarlarında baştaşlar tapıldı.

«Baqılmağan evlerniñ birinde ondan ziyade baştaş taptıq. Olarnı doğru ev temeline qoya ediler. Mencesine, mezarlıq yanında yerleşken hocalıq inşaatlar qurmasına bu baştaşlar qullanılğan edi», – dep qayd etti Umer Çabanov.

Onıñ aytqanlarına köre, baştaşlar zararlandı, lâkin adı, sanı ve doğuv tarihını oqumaq mümkün.

Bundan ğayrı, Körbek köyünde 1909 senesine ait medeniy miras, şu cümleden çeşme ve topraq altındaki suv çıqarılması içün kaptajlar tapıldı.

Eñ yaqın vaqıtta şeer şurası mütehassıslar ve Qırım müzeylerine muracaat etip, tarih içün müim bir yerni alğan yadikârlıqlar aqqında tam bir malümat berilmesini rica etecek.

Bundan evel Körbek köyünde cami qurulacaq yerde eski qırımtatar baştaşını taptılar.

XS
SM
MD
LG