«Yedinaya Rossiya», KPRF, LDPR ve «Spravedlivaya Rossiya» Kabardino-Balkariya, Qırım ve Aqyar yolbaşçıları vazifelerini eda etkenlerge bir ağızdan qol tuttılar.
Bu aqqında Kreml memuriyeti yolbaşçısınıñ birinci muavini Vâçeslav Volodinniñ üç regionda yolbaşçı vazifesine kendi namzetlerini teklif etecek firqalar ile körüşüvden soñ belli oldı, dep yaza «İzvestiya» gazetası.
Umumen subyekt yolbaşçıları olması içün 34 namzet kösterildi.
«Qırım Cumhuriyetiniñ» yolbaşçısı vazifesine, şimdi «onıñ vazifelerini eda etken» Sergey Aksönovdan ğayrı, aşağıdaki namzetler teklif etildi: Qırımnıñ «ekologiya ve tabiat resursları naziri» Gennadiy Narayev (KPRF), Devlet duma deputatı, Qırımdaki «Spravedlivaya Rossiya» bölüginiñ regional bölük yolbaşçısı Aleksandr Terentyev (SR), Qırım devlet müendislik-pedagogika universitetiniñ rektorı Fevzi Yakubov (SR), «Qırım Cumhuriyeti Devlet Şurasınıñ» deputatı Sergey Şuvaynikov (LDPR).
Aqyar yolbaşçısı vazifesine dört firqa bugünki «gübernator» Sergey Menâylonı teklif ettiler.
Ondan ğayrı firqa cedvellerine bular kirdiler: adliyeci, uquq qorçalayıcı Böris Kolesnikov (YER), Aqyarnıñ «ükümetteki tasil ve ilim idaresiniñ reberi», Aqyardaki «Yedinaya Rossiya» regional bölüginiñ kâtibi Viktor Oganesân (YER), KPRF şeer komitetiniñ kâtibi Roman Kiyaşko (KPRF), Aqyar qanun çıqarıcı meclisiniñ deputatı Vasiliy Parhomenko (KPRF), Devlet duma deputatı, Aqyardaki «eserler» regional bölüginiñ yolbaşçısı Mihail Brâçak (SR), Aqyar «gübernatorınıñ muavini» Yevgeniy Dubovik (SR), Aqyar «gübernator muavininiñ mesleatçısı» Oleg Roslâkov (LDPR), Devlet dumasınıñ deputatı Roman Hudâkov (LDPR).
Prezident memuriyetiniñ malümatına köre, qanunğa binaen, parlament firqalarına avgustnıñ 29-na qadar Rusiye prezidentine subyet yolbaşçıları vazifelerine namzetler aqqında tekliflerni seslendirmek mümkün.
Bundan soñ devlet yolbaşçısı er bir regional parlamentke üçer namzet kirsetecek. Saylavlar ise oktâbrniñ 9-da ötkerilecek.
