Link açıqlığı

Qırımda ekstremist edebiyatnıñ qıdıruvı sebebinden daa bir qaç medresede tintüvler keçirdiler.

Avgust 13 künü Aqmescit rayonınıñ üç medresesinde keçirilgen tintüvler aqqında Qırım.Aqiqatqa Qırım musulmanları Müftisiniñ muavini Esadullah Bairov tarif etti.

Onıñ sözlerine köre, medresege apansızdan FSB, prokuratura, sanitar-epidemiologik stantsiyalarnıñ, «tasil nazirliginiñ» ve diger müessiselerniñ hadimleri ziyaret ile buyurdılar

Tintüv netiсеsinde Rusiyede ekstremist sayılğan edebiyat cedvelinden üç kitap taрıldı.

Bairov tintüvler ihtarsız, hadimler tatilde olğan ve medresede tamir işleri keçirilgen vaqıtta olıp keçkenine ayırıca diqqat ete.

«Amelge daa soñunace keçirilmegen avalemiz artından yetişmege tırışalar. Hatalarnı tapıp, soñra olarğa şikâyet etmege isteyler. Oquv yılnıñ başlanmasına eki afta qalğanda, bozuluvlarnıñ cedvelini taqdim ettiler. Olarnı yoq etmek içün aylar kerek. Olarnıñ ögünde bu edebiyatnı mıtlaqa tapmağa bir maqsat bar, çünki, eger de olar oquv yılnıñ başlanmasınen kelse ediler, ekstremist edebiyat aqqında Müftiyatnıñ avalesi amelge keçirilir edi», – dedi Qırım musulmanları diniy idaresiniñ temsilcisi.

Qırımda Rusiye FSB idaresiniñ matbuat hızmetinde buña izaat bermediler.

Qırım.Aqiqat bergen malümatına köre, iyün 24 künü saba saat 6:30 Aqmescit rayonınıñ Bulğanaq köyünde oğlanlar içün hafizler medresesine belgisiz şahıslar sürip kirdi ve tintüvni keçirmege başladı. Medresede 13 talebe ve eki oca buluna edi. Er kes yuqlay edi.

Vesiqalarsız, mahkemeniñ qararı olmadan, qapı ve pencerelerni sındırıp, silâlı insanlar medrese binalarında tintüvlerni keçirmege başladılar. Qırım musulmanları diniy idaresiniñ vekillerine ekstermizm ve silâ saqlanması boyunca mahkeme qararı esasında areket etkenini bildirdiler.

Müftiyatnıñ malümatına köre, tintüvni FSB ve Qırım politsiyasınıñ tahminen 30 hadimi keçirgen edi.

XS
SM
MD
LG