Link açıqlığı

Saatnıñ esas haberi

Qırımda musulmannı «ekstremist» edebiyatı olğanı sebebinden mahkeme etecekler


Qırımda Canköy medresesiniñ müdiri mahkeme etilecek. Oquv yurtunıñ yolbaşçısını Rusiyede yasaq etilgen edebiyatnıñ saqlanmasında qabaatlaylar.

Bunı Qırım.Aqiqat saytına Qırım musulmanları müftisiniñ muavini Esadullah Bairov bildirdi.

O, tapılğan kitaplardan memuriy protokol tizilgenini ve Rusiyede ekstremist sayılğan edebiyatnıñ saqlanuvı ve tarqatıluvı boyunca açılğan işni Canköy mahkemesine berilecegini tarif etti.

Müftiyatnıñ temilcisi bu kibi tintüvler Qırımnıñ diger medreselerinde olacağını da tahmin etti.

Evel Qırım musulmanları diniy idaresinde soñki eki afta islâm oquv yurtlarında, musulmanlarnıñ şahsiy evlerinde «Ekstremist materiallar federal cedveline» kirsetilgen islâm edebiyatnıñ qıdıruvı sebebinden tintüvler keçirilgenini haber ete ediler.

Yasaq etilgen kitaplar cedveli Rusiye Federatsiyası mahkemelerniñ qararları esasında tizilip, 200 saifeden ibaret, onda çeşit dinlerge ait 2 biñden ziyade neşir qayd etilgen.

Dindaşlarnı qorçalamaq maqsadında Qırım müftiyatı cedvelden İslamnen bağlı malümatlarnı ayırıp, öz resmiy saytında derc etti.

Qırım.Aqiqat haber etkeni kibi, avgust 13 künü FSB hadimleri Aqmescit rayonınıñ üç medresesinde tintüvlerni keçirdiler.

XS
SM
MD
LG