«Aqmescit» ava limanınıñ rekonstruktsiyasına «Qırım Cumhuriyetiyeniñ inkişafı boyunca Federal yekâne programması»ndan tahminen 12 mlrd. ruble ayırılacaq. Bunı avgust 15 künü Aqmescit ava limanınıñ baş müdiri Yevgeniy Plaksin bildirdi, – dep haber ete Qırımnıñ öz başına tayin etilgen akimiyetiniñ «ruporı» «Krıminform» saytı.
O qayd etti ki, maliyeviy tarafnı leyhalarnıñ işlep çıqarıluvı ve amelge keçirilüviniñ ayırı basamaqlarına böldiler. Esas paranı ava liman bir buçuq yıldan alacaq.
«Ava limanınıñ inkişafına maliyeviy yardım 2016 senesinden kelecek. 2015 senesi leyhalarnıñ maliyeviy destegi planlaştırıla», – dedi Plaksin.
Onıñ sözlerine köre, «Qırım Cumhuriyetiyeniñ inkişafı boyunca Federal yekâne programması» aerovokzal kompleksiniñ qurucılığını da nazarda tuta.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, Ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
