İşğal etilgen Qırımda jurnalist Rusiye gimni yanğırağan vaqıtta turmağanı sebebinden, onı «Devlet şurasında» akkreditatsiyasız qaldırdılar. Bunı «ATR» qırımtatar telekanalınıñ jurnalisti Şevket Namatullayev öz Facebook saifesinde bildirdi.
«Men qanunnı bozğan bir zatım eken! Şimdi Devlet şurası olaraq adlanğan Qırım Yuqarı Şurasında men endi non grata şahısım – meni atta qara cevdelge kirsettiler. Tefsirleri de meraqlı – men, Rusiye gimni yanğırağan vaqıtta, utanmayıp, turmadım eken», – dedi Şevket Namatullayev.
Jurnalist öz Facebook saifesine «ATR» telekanalınıñ baş müdiri Elzara İslâmovağa «Devlet Şurası işiniñ teşkil etilmesi, uquq çıqarıcı faaliyeti ve cemaatçılıq ile alâqa boyunca daimiy komissiya» reisi Yefim Fiksten mektüpni aşkâr etti.
«Daimiy komissiyağa bir sıra deputatlardan QC Devlet şurasında keçirilecek tedbirlerge «ATR» telekanalınıñ mühbiri Namatullayev Şevketni, o, qanunlarnıñ esas qaidelerine riayet etmegeni sebebinden, akkreditatsiyasız qaldırmağa teklif mektüpleri keldi. 2014 senesi iyül 9 künü Qırım Cumhuriyetiniñ Devlet şurasınıñ nevbetten tış sessiyasında Rusiye Federatsiyası ve Qırım Cumhuriyetiniñ gimni yanğırağan vaqıtta mühbir turmadı ve QC Devlet şurası deputatlarınıñ tenbilerine qulaq asmadı. Mühbir Şevket Namatullayevniñ bu kibi areket tarzına diqqat etmege ve qanunlarnıñ talaplarını añlatıp, onıñ ile subetni keçirmege rica etemiz», – denile mektüptе.
Bunıñ ile vesiqada Fiks Rusiye ve Qırım qanunlarınıñ maddelerini qayd etti. Olarğa binayen, onıñ fikrince, mühbir, Rusiye gimni yanğırağan vaqıtta, turmağa mecbur edi.
